ზურაბ აბაშიძე - ბატონ პრეზიდენტს არაერთხელ ჰქონდა შესაძლებლობა, მხარი დაეჭირა საქართველოს პრემიერ მინისტრის, ჩვენი ხელისუფლების ინიციატივებისთვის

ის რომ საქართველოს პრეზიდენტი რუსეთთან მიმართებაში ჩვენი ხელისუფლების სწორ, პრაგმატულ პოლიტიკას იზიარებს, ეს მისასალმებელია, თუმცა გაუგებარია, რატომ დაიწყო მან რუსეთის პრეზიდენტთან შეხვედრაზე საუბარი ახლა, საპრეზიდენტო ვადის დასასრულისკენ, - ამის შესახებ „ინტერპრესნიუსს“ საქართველოს პრემიერ-მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ პრეზიდენტ გიორგი მარგველაშვილის განცხადების შეფასებისას განუცხადა.

„რუსეთთან მიმართებაში ჩვენი ხელისუფლება პრაგმატულ პოლიტიკას აწარმოებს, რასაც ჩვენი დასავლელი პარტნიორები სრულად უჭერენ მხარს. ის რომ საქართველოს პრეზიდენტი რუსეთთან მიმართებაში ჩვენი ხელისუფლების სწორ, პრაგმატულ პოლიტიკას იზიარებს, ეს მისასალმებელია, თუმცა გაუგებარია რატომ დაიწყო მან რუსეთის პრეზიდენტთან შეხვედრაზე საუბარი ახლა, საპრეზიდენტო ვადის დასასრულისკენ, მით უმეტეს, რომ ადრე ბატონ პრეზიდენტს არაერთხელ ჰქონდა შესაძლებლობა, მხარი დაეჭირა საქართველოს პრემიერ მინისტრის, ჩვენი ხელისუფლების ინიციატივებისთვის და ცნობილი პოზიციისთვის, რომ მაღალი დონის შეხვედრის ჩატარება მიზანშეწონილი იქნება იმ შემთხვევაში, თუკი ასეთ შეხვედრაზე მოხდება საქართველოს ტერიტორიულ მთლიანობასთან დაკავშირებული საკითხების განხილვა და გადაიდგმება კონკრეტული ნაბიჯი ამ პრობლემების მოგვარებისკენ“, - განაცხადა ზურაბ აბაშიძემ.

პრეზიდენტმა გიორგი მარგველაშვილმა განაცხადა, რომ „ნატრობს იმ დროს, როდესაც რუსეთის ლიდერს დაელაპარაკება არა მისი იმიჯიდან, არამედ იმ ინტერესიდან გამომდინარე, რომელიც აქვს რომელიმე რუსულ ოჯახს მოსკოვში იქნება თუ პეტერბურგში“.