გივი მიქანაძე - პარლამენტის ქუთაისის სასახლის ოპერირებისთვის წელიწადში 2.5 მილიონამდე ლარი იხარჯება

პარლამენტის ქუთაისის სასახლის ოპერირებისთვის წელიწადში 2.5 მილიონამდე ლარი იხარჯება, - ამის შესახებ პარლამენტის აპარატის უფროსმა გივი მიქანაძემ ჟურნალისტებთან საუბრისას განაცხადა.

როგორც „ინტერპრესნიუსს“ საქართველოს პარლამენტიდან აცნობეს, ქალაქ ქუთაისში პარლამენტის ფუნქციონირებისთვის დახარჯული საბიუჯეტო თანხების ოდენობით მედიის წარმომადგენლები დაინტერესდნენ, რომლებმაც პარლამენტის აპარატის უფროსის, გივი მიქანაძისგან, აღნიშნულ საკითხზე ინფორმაცია მოისმინეს.

„პარლამენტის ქუთაისის სასახლის ფუნქციონირება წელიწადში 2.5 მილიონ ლარამდე თანხას შეადგენს. თანხა სხვადასხვა კომპონენტს მოიცავს და იმისთვის, რომ სასესიო პერიოდში პარლამენტი ქუთაისში ოპერირებდეს და შენობა ფუნქციონალურ რეჟიმში იმყოფებოდეს, პარლამენტის ბიუჯეტიდან ყოველწლიურად აღნიშნული ოდენობის თანხა იხარჯება“, - განაცხადა გივი მიქანაძემ.

პარლამენტის აპარატის უფროსმა ქუთაისში დეპუტატების საქმიანობისთვის დამატებით გამოყოფილ თანხებზე დასმულ შეკითხვას უპასუხა და აღნიშნა, რომ იმის გათვალისწინებით, რომ პარლამენტის იურიდიული მისამართი არის ქალაქი ქუთაისი, შესაბამისად, ქუთაისში ჩამოსვლის დროს არანაირ დამატებით სამივლინებო ხარჯებს დეპუტატები არ იღებენ.

„მათ აქვთ მხოლოდ ხელფასი და იმ შემთხვევაში თუ მათ უწევთ ქუთაისში დარჩენა, განთავსებასთან დაკავშირებულ თანხებს პარლამენტის წევრები საკუთარი ხარჯებიდან გასწევენ“, - აღნიშნა გივი მიქანაძემ. პარლამენტის აპარატის უფროსმა ქუთაისის სასახლეში არსებული აპარატურის თბილისში გადატანის საკითხებზეც ისაუბრა. „თბილისში არის გარკვეული აპარატურა, თუმცა იმ აპარატურის ნაწილის, რომელიც ქუთაისშია, მოხდება გადატანა და შესაბამისად, სათადარიგო ვარიანტად გამოყენება, რაც დამატებითი ეკონომიის მომენტს ქმნის. შესაბამისად, როდესაც პარლამენტის გადატანის შესახებ გადაწყვეტილება შევა ძალაში, პარლამენტის თბილისის სასახლე სრულ მზადყოფნაში იქნება იმისთვის, რომ სასესიო სხდომები ჩატარდეს და პარლამენტმა ყოველგვარი შეფერხების გარეშე იფუნქციონიროს“, - განაცხადა გივი მიქანაძემ.

პარლამენტის რეგლამენტის ახალი პროექტი საკანონმდებლო ორგანოს ქუთაისიდან თბილისში გადატანას ითვალისწინებს.

ლევან ლორთქიფანიძე - მეგობრების გადამტერებით ქვეყნის უსაფრთხოების უზრუნველყოფა შეუძლებელია
ქართული პრესის მიმოხილვა 06.05.2024
პატრიარქის სააღდგომო ეპისტოლე
IPS-ის ორგანიზებით თბილისში ევროპული ბრენდის - URSA-ს ხმის და თბოიზოლაციის მასალების პრეზენტაცია გაიმართება
ვრცელდება თუ არა თქვენს ავტომობილზე Toyota 10/Lexus 10-ის გარანტია?
ADB-მ და Mastercard-მა ფინანსური ინკლუზიისა და ციფრული ინოვაციების გასაუმჯობესებლად ურთიერთგაგების მემორანდუმს მოაწერეს ხელი