გორის მუნიციპალიტეტის მერის მოადგილემ გელა კაპანაძემ და იაპონიის ელჩმა ტადაჰარუ უეჰარამ, ცხინვალის მოსაზღვრე სოფელ ერგნეთში განაღმვითი სამუშაოების საპრეზენტაციო ჩვენებებში მიიღეს მონაწილეობა.
როგორც „ინტერპრესნიუსს“ გორის მუნიციპალიტეტიდან აცნობეს, ერგნეთში პროექტის გახსნის ცერემონია მოეწყო, სადაც იაპონიის მთავრობის მიერ დაფინანსებული პროექტის: „ადამიანის უსაფრთხოების ადგილობრივი საგრანტო პროგრამის“ შესახებ ისაუბრეს და განაღმული ტერიტორიებიდან ამოღებული ინერტული საბრძოლო მასალა წარმოადგინეს.
გორის მუნიციპალიტეტის ინფორმაციით, იაპონიის საელჩოს დაფინანსებით ორგანიზაცია Halo trust-ი 2017 წლიდან დანაღმული ნაკვეთების გასუფთავების კიდევ ერთ ეტაპს ახორციელებს. ცხინვალთან ახლოს მიმდებარე სოფლების მიწის ნაკვეთების 137 ჰექტარზე მეტი გამოცხადდა უსაფრთხოდ. პროექტის ბიუჯეტი შეადგენს 346 ათას დოლარს.