„ქართულმა ოცნებამ“ ქალ პოლიტიკოსს დაუჭირა მხარი, და პირველად საქართველოს ისტორიაში ჩვენ გვეყოლება ქალი პრეზიდენტი, - ამის შესახებ საპარლამენტო უმრავლესობის წევრმა სოფო კილაძემ პარლამენტის პლენარულ სხდომაძე განაცხადა. მისი თქმით, საქართველოს ტრადიციაა ქალის პატივისცემა და ამის მიუხედავად ზურაბიშვილზე უღირსი ფორმებით მიმდინარეობს თავდასხმა.

„მსურს განცხადება გავაკეთო უფლებრივ ჭრილში - ეს არის ქალი პოლიტიკოსი, ქალი - პრეზიდენტობის კანდიდატი, ქალბატონი სალომე ზურაბიშვილი. ზოგადად, ჩვენი ქვეყნის ტრადიციაა ქალის პატივისცემა, ასევე ერთ-ერთი ძირითადი მიმართულება მსოფლიოში უფლებრივი მიმართულებით ეს არის ქალთა უფლებებისათვის ბრძოლა და ქალთა პოლიტიკური ჩართულობის გაუმჯობესება. მიუხედავად ამისა, ქალზე, პოლიტიკოსზე მიმდინარეობს ყველაზე უღირსი ფორმებით თავდასხმა მხოლოდ იმიტომ, რომ სალომე ზურაბიშვილი არის ქალი. ძალიან ბევრი პოლიტიკური ძალისგან, - პირველ რიგში ვიტყოდი ნაციონალური მოძრაობა და ასევე მისი სხვადასხვა დანაყოფები, ახორციელებენ თავდასხმას და ეს თავდასხმა არის ყველაზე უღირსი ფორმებით, რაც ნამდვილად, ყველაზე რბილად რომ ვთქვათ, არის ძალიან ამორალური.

თავდასხმა ასეთი უღირსი ფორმებით ადამიანზე, როდესაც ის არის ქალი და იმიტომ, რომ არის ქალი, ეს არის ყოვლად მიუღებელი. მე ნამდვილად ძალიან მიხარია ის, რომ ჩვენმა პოლიტიკურმა ძალამ დაუჭირა ქალ პოლიტიკოსს მხარი, და ჩვენ გვეყოლება პრეზიდენტი საქართველოსი, რომელიც იქნება პირველად ისტორიაში ქალი. ეს მნიშვნელოვანია ჩვენი ქვეყნის ევროატლანტიკური ინტეგრაციისთვის, ჩვენი მოსახლეობის კეთილდღეობისთვის“, - განაცხადა ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ.

აღნიშნულ კომენტარს პარლამენტის პრესსამსახური ავრცელებს.