შსს-ს განმარტებით, ჟურნალისტ ზურაბ ვარდიაშვილის ცემის ფაქტზე ამ ეტაპზე ერთი პირის ბრალეულობა გამოიკვეთა, თუმცა უწყებაში აღნიშნავენ, რომ სხვა პირების მხრიდან კანონსაწინააღმდეგო ქმედებების დამტკიცების შემთხვევაში, კანონით გათვალისწინებულ ზომების მიიღებენ. როგორც „ინტერპრესნიუსს“ შსს-ში განუცხადეს, თავად დაზარალებულმა კონფლიქტში მონაწილე ვერც ერთი პირი ვერ ამოიცნო, თუმცა უწყებამ საქმეზე ერთი პირი უკვე დააკავა

„ამ ეტაპზე გამოიკვეთა მხოლოდ ერთი პირის ბრალეულობა, რომელიც დაკავებულია და გამოძიება სსკ-ის 126-ე მუხლის 1-ელი ნაწილით მიმდინარეობს. საქმეზე გამოძიება გრძელდება და სხვა პირების მხრიდან კანონსაწინააღმდეგო ქმედებების დამტკიცების შემთხვევაში მიღებული იქნება კანონით გათვალისწინებული ზომები“, - განაცხადეს შსს-ში.

ჟურნალ “ლიბერალის” რედაქტორს ზურაბ ვარდიაშვილს 15 სექტემბერს სცემეს. ვარდიაშვილის ინფორმაციით, მას 5-7 კაციანი ჯგუფი დაესხა თავს და ფიზიკურად გაუსწორდა.