თავდაცვის სამინისტროს ყოფილი თანამშრომლების საიდენტიფიკაციო მონაცემების გამოყენებით, მათი გათავისუფლების შემდგომ თვეებში ხდებოდა საბანკო ანგარიშებზე ხელფასის დარიცხვა, - ამის შესახებ საქართველოს თავდაცვის სამინისტროს აპარატის 2017 წლის ფინანსური აუდიტის ანგარიშშია ნათქვამი.

აუდიტის სამსახურის ინფორმაციით, 2017 წელს ამ მიზნით საბანკო ანგარიშებზე ჩარიცხულმა თანხამ შეადგინა, სავარაუდოდ, 140,543.63 ლარი. ანგარიშში ასევე აღნიშნულია, რომ ამის თაობაზე ეცნობება საქართველოს მთავარ პროკურატურას.

„სამინისტროში დასაქმებულ მოსამსახურეებზე, 2017 წელს „შრომის ანაზღაურების“ მუხლით გაწეული ფულადი სახსრების ანალიზისას გამოიკვეთა მაღალი რისკის შემცველი გარემოებები. კერძოდ: შესაბამისი აუდიტორული პროცედურებით დადგინდა, რომ ყოფილი თანამშრომლების საიდენტიფიკაციო მონაცემების გამოყენებით, მათი გათავისუფლების შემდგომ თვეებში ხდებოდა საბანკო ანგარიშებზე (რომლებიც მანამდე ამ პირების მიმართ არ გამოიყენებოდა) ხელფასის დარიცხვა. 2017 წელს ამ მიზნით საბანკო ანგარიშებზე ჩარიცხულმა თანხამ შეადგინა, სავარაუდოდ, 140,543.63 ლარი. ზემოაღნიშნულ გარემოებებთან დაკავშირებით, აუდიტის მიმდინარეობისას ეცნობა საქართველოს მთავარ პროკურატურას.

არსებობს მაღალი რისკები იმისა, რომ შესაბამისი შიდა კონტროლის არარსებობის პირობებში, ფულადი განაცემები მიმართული იყოს იმ პირებზე, რომლებიც შესაბამის პერიოდში არ იყვნენ სამინისტროს სისტემაში დასაქმებული თანამშრომლები,” - ნათქვამია ანგარიშში.

ამასთან, ანგარიშში აღნიშნულია, რომ თავდაცვის სამინისტროს ფინანსების მართვის დეპარტამენტს თანამშრომელთა გათავისუფლების შესახებ ბრძანებები არ მიეწოდებოდა. შესაბამისად, აუდიტის ანგარიშის მიხედვით, ამ დეპარტამენტის მიერ ვერ ხორციელდება აღნიშნულ პროცესზე ადეკვატური კონტროლი.