ხორავას ქუჩაზე მომხდარი მკვლელობის საქმეზე, შეუტყობინებლობის ბრალდებით დაკავებული მირზა სუბელიანი სასამართლომ პატიმრობაში დატოვა. სუბელიანისთვის შეფარდებული აღკვეთის ღონისძიების გადასინჯვის საკითხზე სასამართლომ დღეს იმსჯელა.

პროკურორის თქმით, არსებობს მოწმეებზე ზეწოლის ან მიმალვის საფრთხე.

პროკურატურის პოზიციის შემდეგ დაცვის პოზიცია თავად ბრალდებულმა დააფიქსირა.

"საზოგადოებრივი ინტერესი იმდენად დიდია, რომ ეს ჩემთვის პოპულარიზაცია არ არის ჩემი თავის. უბრალოდ ჩემი პოზიციაა, რომ მე კიდევ ერთხელ ვუსამძიმრებ ზაზა სარალიძეს. ასევე, მე ვაცხადებ, რომ ვეთანხმები ბრალდების მხარეს და მსურს, დავრჩე პატიმრობაში, თუმცა ეს არ გამომდინარეობს იქიდან, რომ ჩემი მიმალვის საფრთხე არსებობს. ჩემი აქ ყოფნა სიკვდილის ტოლფასია. მირჩევნია, გასვენება იყოს ჩემი, ვიდრე აქ ვიჯდე," - განაცხადა მირზა სუბელიანმა.

საქმის არსებითი განხილვა 1-ელ ოქტომბერს, 12:00 საათზე გაიმართება.