დიმიტრი ქუმსიშვილი - „მცირე და საშუალო კომპანიების დაკავშირება მულტინაციონალურ კომპანიებთან ძალიან მნიშვნელოვანია ჩვენი ქვეყნისთვის

მცირე და საშუალო საწარმოების მულტინაციონალურ კომპანიებთან თანამშრომლობა ძალიან მნიშვნელოვანია ქართული პროდუქციის ხარისხის გაუმჯობესებისა და იმპორტის ჩანაცვლებისთვის, - ამის შესახებ პირველმა ვიცე-პრემიერმა, ეკონომიკის მინისტრმა დიმიტრი ქუმსიშვილმა განაცხადა.

როგორც „ინტერპრესნიუსს“ ეკონომიკის სამინისტროდან აცნობეს, ქუმსიშვილმა აღმოსავლეთ ევროპისა და ცენტრალური აზიის დირექტორატში „კარგი მმართველობის ფონდის“ ხელმძღვანელ რიჩარდ დიუდნისთან ერთად, პროექტის „ბიზნესკავშირები მცირე და საშუალო ბიზნესისთვის“ დეტალები და გეგმები განიხილა. პროექტს საქართველოს ეკონომიკისა და მდგრადი განვითარების სამინისტროს სააგენტო „აწარმოე საქართველოში,“ საკონსულტაციო კომპანია PricewaterhouseCoopers-თან ერთად, გაერთიანებული სამეფოს (UK Good Governance Fund) „კარგი მმართველობის ფონდის“ დაფინანსებით ახორციელებს.

როგორც შეხვედრაზე აღინიშნა, პროექტის მიზანია საქართველოში ხელი შეუწყოს ადგილობრივი მცირე და საშუალო ბიზნესის განვითარებას, მის უკეთესად ოპერირებასა და ეფექტურობის გაზრდას. პროექტის ფარგლებში, ადგილობრივ მცირე და საშუალო ბიზნესის წარმომადგენლებს შესაძლებლობა ექნებათ დაუკავშირდნენ საქართველოში არსებულ მულტინაციონალურ და ე.წ. ფრენჩაიზინგის კომპანიებს პროდუქციის და მომსახურების მიწოდების მიზნით სამასპინძლო ინდუსტრიის სფეროში (HoReCa).

„მცირე და საშუალო კომპანიების დაკავშირება მულტინაციონალურ კომპანიებთან ძალიან მნიშვნელოვანია ჩვენი ქვეყნისთვის, მცირე და საშუალო საწარმოებისთვის და იმისთვის, რომ ახალი სამუშაო ადგილები შეიქმნას. პროგრამა, რომელსაც დღეს ჩვენ ვახორციელებთ „კარგი მმართველობის ფონდთან,“ ეხმარება მცირე და საშუალო ბიზნესს, რომ მათი პროდუქცია, მათი სერვისები და მომსახურება შევიდეს მულტინაციონალურ კომპანიებში. ძალიან მარტივად რომ მოგახსენოთ, ეს გვაძლევს იმის საშუალებას, რომ მცირე და საშუალო საწარმოებმა, ერთი მხრივ, თავისი პროდუქტები გაყიდონ ისეთ კომპანიებში, რომლებსაც საკმაოდ მაღალი მოთხოვნები აქვთ პროდუქციის სტანდარტების მიხედვით, მეორე მხრივ კი მულტინციონალურ კომპანიებს აღარ შემოაქვთ ეს პროდუქტები საზღვარგარეთიდან ანუ ხდება იმპორტის ჩანაცვლება“, - განაცხადა შეხვედრის დასრულების შემდეგ დიმიტრი ქუმსიშვილმა.

მისივე თქმით, საბოლოო ჯამში, ჩვენი მცირე და საშუალო ბიზნესი მიაღწევს იმ სტანდარტებს, როგორიც მულტინაციონალურ კომპანიებს სჭირდებათ. საუბარია ისეთ კომპანიებზე, როგორიცაა, მაგალითად, „დანკინ დონატსი“, „მაკდონალდსი“, სასტუმროების ქსელი „ჰილტონი“ და სხვა.

შეხვედრის მონაწილეების შეფასებით, პროექტის ფარგლებში გაიზრდება მოთხოვნა ადგილობრივი წარმოების საქონელსა და მომსახურების შესყიდვაზე, რაც ხელს შეუწყობს მცირე და საშუალო საწარმოების გაფართოებასა და სექტორში არსებული კომპანიების გაუმჯობესებას.

სამეტაპიანი პროექტის პირველ ეტაპზე, კვლევის საფუძველზე, მოხდა ინდუსტრიების იდენტიფიცირება, ხოლო მეორე ეტაპზე მიმდინარეობს პროექტის საპილოტე ფაზის უშუალო განხორციელება შერჩეულ კომპანიებთან ინტენსიური თანამშრომლობით. მეორე ეტაპის ფარგლებში, სამომავლოდ დაგეგმილია შეხვედრა მულტინაციონალურ კორპორაციებთან, რათა მოხდეს მათი ჩართულობის გაზრდა პროექტში, ადგილობრივ მცირე და საშუალო სექტორთან შესახვედრად, ასევე, შემაჯამებელი ღონისძიება, რომელიც მოიაზრებს ორი მხარის დაკავშირებას B2B შეხვედრების მეშვეობით.

საბოლოო, მესამე ეტაპზე, შემუშავდება პროექტის გეგმა, რომელიც მოიცავს ახალ და შერჩეულ სექტორებში საპილოტე პროექტზე დაყრდნობით, პროექტის განხორციელების სამომავლო გეგმას და რეკომენდაციებს, რაც ხელს შეუწყობს პროექტის მდგრადობას.

მიმდინარე ეტაპზე ტარდება ტრეინინგები 16 შერჩეული კომპანიისგან შემდგარ ორ ჯგუფთან. ტრეინინგ-პროგრამები სხვადასხვა მოდულებში იმართება 5 კვირის განმავლობაში: სტრატეგია და დაგეგმვა, ლიდერობა და მენეჯმენტი, მომხმარებელზე ორიენტირებულოება, ხარისხი და ოპერაციები, გაყიდვები მულტინაციონალურ კომპანიებთან, ფინანსები და ადამიანური რესურსების მართვა.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
აკადემიკოსი გიორგი ჯაფარიძე - ქვეყანა რომ წარმოდგენილი იყოს მსოფლიოს სამეცნიერო რუკაზე, აუცილებელია მასში მცხოვრები მეცნიერები თავისი საქმიანობით მონაწილეობდნენ საერთაშორისო სამეცნიერო პროცესში
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს